Ուղեցույց․ ինչպե՞ս կազմել բիզնես պլան անշարժ գույքի ոլորտում

1. Հստակեցնում է տեսլականն ու նպատակները

Լավ ձևակերպված բիզնես պլանն օգնում է ֆիքսել ձեր ցանկալի արդյունքները և սահմանել հասանելի նպատակներ անշարժ գույքում ձեր գործունեության համար։ 

2․ Օգնում է կայացնել որոշումներ

Անշարժ գույքի դինամիկ և, երբեմն, անկանխատեսելի ոլորտում տեղեկացված որոշումների կայացումը կենսական նշանակություն ունի։ Բիզնես պլանը թույլ է տալիս վերլուծել շուկայի միտումները, գնահատել հնարավորություներն ու ռիսկերը և կատարել ռազմավարական որոշումներ, որոնք համապատասխանում են ձեր երկարաժամկետ նպատակներին։

3․ Գրավում է ներդրողներ

Այն ձեռնարկատերերի համար, ովքեր փնտրում են ֆինանսավորում կամ ներդրումային համագործակցություններ, լավ ձևակերպված բիզնես պլանն անհրաժեշտություն է։ Այն ցույց է տալիս ձեր պրոֆեսիոնալիզմը, վստահելիությունը և տեսլականն իրագործելու ունակությունը՝ դարձնելով ձեր նախագիծն ավելի գրավիչ պոտենցիալ ներդրողների և ֆինանսավորողների համար։

4․ Ստեղծում է հաշվետվողականություն

Բիզնես պլանը ծառայում  է որպես նախագծի առաջընթացը չափող գործիք՝ պահելով հաշվետվողականությունը սահմանված նպատակների նկատմամբ։ Հստակ նշաձողեր, ժամկետներ և չափանիշներ սահմանելով՝ դուք կարող եք հետևել և տեսնել ձեռքբերումները կամ կատարել փոփոխություններ՝ ավելի մեծ արդյունավետության հասնելու համար։

– Բիզնես պլան կազմելու քայլերը

Բիզնես պլանի կարևորությունը հասկանալուց հետո եկեք տեսնենք, թե ինչ քայլեր և գործողություններ է անհրաժեշտ անշարժ գույքի ներդրման բիզնես պլան կազմելու համար։

1․ Շուկայի ուսումնասիրություն

Սկսեք շուկան ուսումնասիրելով, որպեսզի հասկանաք դրա նրբությունները, դինամիկան, միտումները և մրցակցային միջավայրը։ Հետազոտեք առաջարկն ու պահանջարկը, ժողովրդագրական շարժը, գործող օրենքներն ու կարգավորումները և տնտեսական ցուցանիշները։

2․ Տվյալների հավաքագրում

Շուկայի ուսումնասիրությունների արդյունքում ստացած տվյալներն անհրաժեշտ է հավաքագրել և տալ կառուցվածք։ Եթե կան պակասող տվյալներ, փորձեք գտնել միջոցներ դրանք ձեռք բերելու համար։ Անհրաժեշտ է մեկ վայրում հավաքել հնարավորինս շատ ինֆորմացիա այն շուկայի կամ նախագծի մասին, որի մեջ պատրաստվում եք ներդրում կատարել։

3․ Որոշումների կայացում

Հավաքագրված տվյալների հիման վրա անհրաժեշտ է կայացնել նախագծի հետ կապված մի շարք կարևոր ռազմավարական որոշումներ։ Բիզնես պլանի գլուխներն ուսումնասիրելիս (որոնց մասին գրված է ստորև) կառաջանան մի շարք հիմքային հարցեր, որոնց պատասխանելու համար, միգուցե, անհրաժեշտ լինի կրկին անցնել առաջին քայլին և կատարել հավելյալ ուսումնասիրություններ։

4․ Բիզնես պլանի լրացում

Սա բիզնես պլանի կազմման վերջին փուլն է, որտեղ անհրաժեշտ է հերթականությամբ լրացնել բոլոր անհրաժեշտ տեղեկատվությունը ձեր պլանավորած նախագծի մասին։ Կայացրած ռազմավարական որոշումների ևկատարած մանրակրկիտ ուսումնասիրությունների հիման վրա անհրաժեշտ է լրացնել նախագծի մանրամասները՝ այն գործողությունների շարքը, որոնք կբերեն հաջողության, և սպասվող արդյունքները։

– Անհատականացված բիզնես պլանի կազմում

Բիզնես պլան կազմելիս շատ կարևոր է հասկանալ, թե ում կամ ինչի համար է այն կազմվում։ Հասկանալով յուրաքանչյուր լսարանին հատուկ կարիքները՝ դուք կարող եք կազմել ավելի արդյունավետ բիզնես պլան։ 

Եթե բիզնես պլանը կազմում եք ինքներդ ձեզ համար, անհրաժեշտ է ուշադրություն դարձնել գործողությունների հաջորդականության մանրակրկիտ ձևակերպումների վրա։ Իսկ եթե, օրինակ, կազմում եք ներդրողների համար, ում ավելի շատ հետաքրքրում է ֆինանսական արդյունքների հատվածը, անհրաժեշտ է այն համապատասխանեցնել տվյալ կարիքներին։ Միգուցե այն լսարանը, որին դուք պետք է ներկայացնեք դա, ավելի մեծ առաջնահերթություն է տալիս շուկայի հնարավորություններին և եկամտաբերությանը, իսկ միգուցե՝ ռիսկերին և դրանց զսպման քաղաքականությանը։

Բիզնես պլանն անհատականացնելու համար անհրաժեշտ է հասկանալ լսարանի կարիքները և ըստ դրա փոխել գլուխների դասավորությունը, ծավալը, և, միգուցե, նաև բովանդակությունը։

1․ Ամփոփ նկարագիր

Բիզնես պլանը սկսեք անշարժ գույքի ոլորտում ձեր նախաձեռնության ամփոփ նկարագիրը ձևակերպելուց։ Սահմանեք նախագծի տեսլականը, առաքելությունը, և համառոտ ներկայացրեք հիմնական ռազմավարություններն ու նպատակները, որոնք ներառված են բիզնես պլանում։ Ընդգծեք ձեր նախաձեռնության յուրահատուկ արժեքային առաջարկները և ցանկացած նշանակալի ձեռքբերում։

2․ Շուկայի վերլուծություն

Հավաքագրված տվյալների հիման վրա կատարեք անշարժ գույքի շուկայի վերլուծություն, դուրս բերեք հնարավորություններն ու խնդիրները, ուժեղ և թույլ կողմերը, ինչպես նաև դրա պոտենցիալը և հաճախորդների բազան։

3․ Բիզնեսի նկարագրություն

Նկարագրեք բիզնեսի հայեցակարգը, կառուցվածքը, իրավական հարցերի լուծումները։ Մանրամասնեք, թե ինչպես է այն աշխատելու, որոնք են լինելու եկամտի հիմնական աղբյուրները, ինչպես է այն զարգանալու։

4․ Ռազմավարական պլան

Ընդգծեք երկարաժամկետ նպատակները, դրանց հասնելու համար անհրաժեշտ գործողությունները, ժամանակահատվածները։

5․ Մարքեթինգ և վաճառք

Մանրամասն նկարագրեք հաճախորդների ներգրավման և վաճառքների իրականացման պլանները, գործողությունները, աղբյուրները, հնարավորությունները։

6․ Ֆինանսական կանխատեսումներ

Պատրաստեք մանրամասն ֆինանսական կանխատեսումներ եկամուտների, ծախսերի, դրամական հոսքերի մասին հստակ ժամանակահատվածներով։ Ներառեք տարբեր աղբյուրներից եկամուտների գեներացումը, դրանց օգտագործումը և շահույթի բաշխումը։

7․ Ռիսկերի կառավարում

Գտեք այն բոլոր պոտենցիալ ռիսկերը, որոնք կարող են որևէ կերպ ազդել բիզնեսի անխափան աշխատանքի վրա։ Դրանցից յուրաքանչյուրի համար կազմեք զսպման կամ կոմպենսացման ռազմավարություններ և հստակ գործողությունների ցանկ, որոնք թույլ կտան մեղմել կամ վերացնել դրանք։

Բիզնես պլանը պարզապես կազմելու համար չէ, այն անհրաժեշտ է նաև կիրառել․

– Սկսեք այն բաժանել փոքր իրագործելի քայլերի և հերթով իրականացրեք այդ քայլերը։

– Ձեռք բերեք և բաշխեք ռեսուրսներն ըստ անհրաժեշտության, ներառյալ մարդկային, ֆինանսական և այլ տիպի։

– Հետևեք առաջընթացին՝ համոզվելու համար, որ ամեն ինչ գնում է պլանին համաձայն, և տեղյակ պահեք ներդրողներին կատարված քայլերի մասին։

– Գնահատեք պլանից շեղումները և փորձեք բացահայտել դրանց պատճառները։

– Նոր ինֆորմացիայի հիման վրա կատարեք անհրաժեշտ փոփոխությունները բիզնես պլանում՝ դրա արդյունավետությունը բարձրացնելու համար։

Բիզնես պլանը հստակեցնում է տեսլականն ու նպատակները, օգնում է կայացնել որոշումներ, գրավում է ներդրողներ և ստեղծում է հաշվետվողականություն։ Բիզնես պլան կազմելու համար անհրաժեշտ է կատարել այնպիսի քայլեր, ինչպիսիք են շուկայի ուսումնասիրությունը, տվյալների հավաքագրումը, որոշումների կայացումը, բիզնես պլանի լրացումը։ Բիզնես պլանը պարզապես կազմելու համար չէ, այն անհրաժեշտ է նաև կիրառել։