Դիվերսիֆիկացիան անշարժ գույքում․ ինչու՞ է դա կարևոր

Անշարժ գույքում ներդրումները պարունակում են ներհատուկ ռիսկեր՝ սկսած շուկայական տատանումներից մինչև գույքի հետ կապված խնդիրներ: Պորտֆոլիոյի դիվերսիֆիկացիան ծառայում է որպես ռիսկի նվազեցման հզոր ռազմավարություն՝ ներդրումային կապիտալը տարածելով ակտիվների սպեկտրի վրա և նվազագույնի հասցնելով ռիսկի որևէ մեկ գործոնի ազդեցությունը: 

Լավ դիվերսիֆիկացված պորտֆոլիոն կարող է օգնել ներդրողներին դիմակայել շուկայի անորոշություններին և պատահական անկումներին։ Դրա շնորհիվ ներդրողները նվազեցնում են պորտֆոլիոյի խոցելիությունը և հնարավորություն են ունենում պահպանել կապիտալը երկարաժամկետ ժամանակահատվածում։ Դրանից բացի, դիվերսիֆիկացիան թույլ է տալիս օգտվել շուկայի տարբեր մասերում պարբերաբար առաջացող հնարավորություններից՝ մեծացնելով ընդհանուր եկամտաբերությունը։

Դիվերսիֆիկացիան, սակայն, պարզապես ռեսուրսների բաշխումը չէ։ Այն իրենից ներկայացնում է սեփական նախընտրությունների և հաշվարկների հիման վրա կայացրած որոշումների ամբողջություն, որոնք միասին բերում են առավելագույն պաշտպանություն ունեցող պորտֆոլիոյի կառուցման։

– Ակտիվների դասի դիվերսիֆիկացիա

Անշարժ գույքի ոլորտը լայն դաշտ է, որն առաջարկում է տարբեր տիպի ակտիվներ։ Ակտիվների յուրաքանչյուր դաս, ինչպիսիք են՝ բնակելի, առևտրային, արդյունաբերական և այլ տիպի գույքերը, տարբեր կերպ է արձագանքում տնտեսական ցիկլերին։ Ակտիվների դասերի դիվերսիֆիկացումն ապահովում է, որ մի հատվածի անկումը փոխհատուցվի մյուսների ճկունությամբ: 

Դրանք են․

– Բնակելի անշարժ գույք․ Այս տիպի գույքերն առաջարկում են կայուն եկամուտ, քանի որ ապրելու վայրը մարդկանց հիմնարար կարիքներից է, սակայն դրանց արդյունավետությունը մեծապես կախված է այնպիսի տնտեսական գործոններից, ինչպիսիք են գործազրկությունն ու վարկերի տոկոսադրույքները։

– Գրասենյակային և առևտրային անշարժ գույք․ Այստեղ ներառված են գրասենյակները և մանրածախ բիզնեսի համար տարածքները։ Այսպիսի անշարժ գույքը սովորաբար ավելի զգայուն է տնտեսական տատանումների նկատմամբ, ինչպիսիք են ոլորտային անկումները։

– Արդյունաբերական անշարժ գույք․ Սրանք հիմնականում արտադրական կամ պահեստային տարածքներն են։ Այսպիսի գույքի պահանջարկը բարձրացել է առցանց առևտրի աճի շնորհիվ, և այսօր ավելի շատ կախված է ոչ թե տեղական, այլ գլոբալ տնտեսական տատանումներից։

– Հասարակական անշարժ գույքեր․ Այս դասին են պատկանում ռեստորանները, մարզասրահները, առողջապահական և կրթական շինությունները։ Այսպիսի գույքը շատ զգայուն է հատուկ գործոնների նկատմամբ, ինչպիսիք են կրթական կամ առողջապահական կարգավորումները։

– Աշխարհագրական դիվերսիֆիկացիա

Աշխարհագրական դիվերսիֆիկացիան ենթադրում է ներդրումների տարածում տարբեր թաղամասերում, քաղաքներում և նույնիսկ երկրներում: Աշխարհագրական դիվերսիֆիկացմամբ ներդրողները նվազեցնում են շուկայի տեղայնացված անկումների, կարգավորող փոփոխությունների կամ որոշակի տարածաշրջանների վրա ազդող տնտեսական տեղաշարժերի հետ կապված ռիսկերը: Բացի այդ, աշխարհագրական դիվերսիֆիկացիան օգտագործում է հնարավորությունները բարձր աճի շուկաներում՝ միաժամանակ պաշտպանելով լճացած կամ անկում ապրող շուկաների խոցելիությունը:

Աշխարհագրական դիվերսիֆիկացիա իրականացնելու համար անհրաժեշտ է ունենալ համապարփակ գիտելիքներ տարբեր վայրերի շուկաների, կարգավորումների և նրբությունների մասին։ Ռազմավարության ճկունությունը պահպանելու համար անհրաժեշտ է մշտապես հետևել աշխարհաքաղաքական իրավիճակին և նորություններին, օրենսդրական դաշտի փոփոխություններին։

– Եկամուտների հոսքի դիվերսիֆիկացիա

Եկամուտների հոսքի դիվերսիֆիկացիան անշարժ գույքում նշանակում է գույքի կողմից գեներացվող եկամուտների աղբյուրների ընդլայնում։ Կարճաժամկետ կամ երկարաժամկետ վարձակալությամբ տրվող գույքերից ստացվող եկամտի, գույքի արժեքի ավելացման և եկամտի օժանդակ աղբյուրների միախառնումը, ինչպիսիք են ավտոկայանատեղիների վճարները, պահեստների վարձակալությունը կամ այլ հարմարությունները, ամրապնդում է պորտֆոլիոյի կայունությունը: Այսպիսի դիվերսիֆիկացիան թույլ է տալիս օգտվել սպառողների տարբեր կարիքներից և ապահովագրում է սպառողական կարիքների փոփոխության պոտենցիալ վտանգներից։

– Ռիսկ-եկամուտ հարաբերակցություն

Ներդրումների դիվերսիֆիկացիան ենթադրում է ռիսկի և եկամուտների փոխզիջում: Թեև բարձր ռիսկային հնարավորությունները կարող են առաջարկել մեծ եկամտաբերության ներուժ, դրանք նաև ենթադրում են ավելի մեծ անկայունություն: Ընդհակառակը, կենտրոնական վայրերում կայուն եկամուտ ստեղծող գույքն առաջարկում է ավելի ցածր ռիսկ, բայց կարող է ապահովել ավելի համեստ եկամուտներ: Բազմաթիվ հնարավորությունների մեջ անհրաժեշտ է գտնել հավասարակշռություն և կառուցել պորտֆոլիո, որտեղ կան տարբեր ռիսկայնությամբ և եկամտաբերությամբ ներդրումներ։

– Պորտֆոլիոյի դինամիկ կառավարում

Անշարժ գույքի ներդրումային մասնագետները պետք է զգոն և սառնասիրտ մնան՝ ակտիվորեն վերաբաշխելով ռեսուրսները և վերաբալանսավորելով պորտֆելները՝ ի պատասխան փոփոխվող տնտեսական ցուցանիշների, շուկայի միտումների և ներդրողների նախասիրությունների: Մշտապես մանրակրկիտ ուսումնասիրություններ կատարելուց մինչև պորտֆոլիոյի պարբերական ճշգրտումներ․ դինամիկ կառավարման շնորհիվ կարող եք բարձրացնել ձեր ներդումների դիվերսիֆիկացիայի ռազմավարության արդյունավետությունը և մշտապես մնալ զարգացող միտումների առջևում։

– Պորտֆոլիոյի հարմարեցումը սեփական նախընտրություններին

Ինչպես հնարավոր չէ գտնել երկու նույնատիպ ներդրող, այնպես էլ հնարավոր չէ գտնել դիվերսիֆիկացիայի ռազմավարություն, որն աշխատում է բոլորի համար: Յուրաքանչյուր ներդրող ունի որոշակի նպատակներ։ Դա կարող է լինել կապիտալի երկարաժամկետ կուտակում, արագ և մեծ եկամուտի ստեղծում կամ սեփական ծախսերի համար կայուն եկամուտի ապահովում։ Դրանից բացի, տարբեր մարդիկ ունեն ռիսկի նկատմամբ տարբեր հանդուրժողականություն, ինչը նշանակում է, որ անգամ դիվերսիֆիկացիայի դեպքում ոմանք ցանկանում են նվազագույնի հասցնել ռիսկերը, ոմանք՝ առավելագույնի հասցնել հնարավոր եկամուտը։

Այսպիսով, ի՞նչ է դիվերսիֆիկացիան անշարժ գույքում։ Այն ռիսկերը նվազեցնելու և եկամուտներն առավելագույնի հասցնելու միջոց է։ Հասկանալով այն և կիրառելով պորտֆոլիոյի ձևավորման մեջ՝ հնարավոր է ապահովել ֆինանսական կայունություն։ Անշարժ գույքում ներդրումներ կատարելիս հարկավոր է հաշվի առնել դիվերսիֆիկացիայի ռազմավարությունները և կիրառել դրանք՝ սեփական նպատակներին համապատասխան։